दहन्निव निशापतिश्शिशिरदीधितस्सम्बभौ
निदाघदहनोपमो मलयमरुतोऽभासत।
शिरोधरणिधारणे निहितमंशतो वक्रता-
महो फणिपतेरगात्प्रकटरोषणे लक्ष्मणे।।1

हा नाथ! वाचिकमुदीरितमात्मगेहे
यच्चापि तस्य विवृतिर्न मयाऽनुभूता।
स्वाम्बाचरित्रशुभशीलमहो विनिन्द्य
जातोऽस्मि हन्त पशुतोऽपि निकामनीचः।।2

विच्छिन्नजाड्यमतिमान्द्यकुबुद्धिमूलो
न्यग्रोधकल्परजकः परितापबिद्धः।
मां पाहि राघव! पशुं शरणागतन्ते
सीताऽपवादपिशुनं परुषाऽपराधम्।।3

क्षणं गुरौ पौरजने क्षणञ्च
क्षणं नु सौमित्रिमुखे विवर्णे।
सञ्चार्य दृष्टिं स्फुटमिङ्गितज्ञो
रामस्तमङ्के रजकञ्चकार।।4

तातः कोऽपि पितामहोऽथ जनकभ्राता पितृव्योऽथवॉ
माता साऽपि पितामही तदनु सा तातस्वसाऽम्बास्वसा।
मातामह्यथ मातुलश्च भगिनी मातामहो वाऽपरो
हन्तैकस्य हि जातकस्य कति नो सम्बन्धिनस्तन्वते।।5

ह्यस्तनं दिवसं यावद्योऽहमम्बासुतोऽभवम्।
स एवाऽद्य पिता जातो युग्मयोश्चित्रमेव तत्।।6

चन्द्रस्ते नेत्रयुग्मं शिशिरयतु सदा लोकगाढानुरक्त्या
भानुस्त्वां भूरिदीप्तं कमलसुममिव प्राज्यगन्धं विधत्ताम्।
एते दीप्यद्दिगन्तास्तव विमलयशो मञ्जु विस्तारयेयु-
र्नित्यं त्रैलोक्यशोकं प्रहर रघुपते! सानुजस्त्वं ससीतः।।7

अद्य रघुपतिसदने लसति सुदिनम्
देवी सीता सूतवतीह तनययुगलम्!!
प्रवहति शिशिरो मलयगिरिपवनः
विधुरिव सुखयति दिवसेऽपि तपनः
अद्य सुरपुरमिव विलसति भवनम्
देवी सीता सूतवतीह तनययुगलम्!!
कौसल्या चुम्बति सुतवधूमिह सीताम्
कैकेयी नन्दति मधुवचनभरैस्ताम्
अद्य तनुते सुमित्रा सूतगृहगायनम्
देवी सीता सूतवतीह तनययुगलम्!!
क्वापि वेदगानमिन्द्रजालमथ मायिनाम्
क्वापि विरुदावली चारणव्यवसायिनाम्
क्वापि विटचेट भण्डगणिकादिनर्तनम्!
देवि सीता सूतवतीह तनययुगलम्!!
वितरति भरतो विविधविधदानम्
सोऽपि रिपुसूदनो विशदयति मानम्
रामस्सेवते सलक्ष्मणो वसिष्ठचरणम्!
देवी सीता सूतवतीह तनययुगलम्!!8

हुङ्कृतिविकलकरालदशनकण्ठीरवपृष्ठारूढा
चण्डमुण्डमहिषोपमर्दिनी महाकालिका गूढा।
ज्वलत्त्रिनयना प्रहसितवदना बद्धा विद्याभ्यासे
एषा प्रकटीभवति समक्षं भवतां नीलाकाशे!!9

प्रकटचिटचिटाऽरवैदहन्तं पिबाम्यहं वह्निम्
निर्नौकः पारयाम्यहं पदगत्यैवाऽम्बुनिधिम्।
विदधे कुण्ठान् कण्ठीरवान् गृहीत्वा तत्पुच्छम्
अस्वच्छोऽपि शरीरैर्वसनैर्दधेऽन्तरं स्वच्छम्।।10

स्तम्भं विदार्य शत्रुं प्रचार्य सञ्चार्य दैत्यसंघम्
उच्चैर्विनद्य दंष्ट्राभिरद्य भीषयन् कशिपुमन्धम्।
नरसिंह एष ननु विकटवेष आलोक्यतेऽम्बरान्ते
प्रह्लादमेकमाह्लादयन्नतितरां कृतं स्वान्ते!!11

सुराऽसुरैर्मथितोऽयं सिन्धुः!
देवनिचय एकतोऽप्यरतो यत्नपरोऽसुरबन्धुः!!
मन्दरमन्थदण्डमथितमिह घूर्णति सागरनीरम्
व्याकुलविकटनक्रझषकच्छपशिशुमारश्रिततीरम्।।
श्रीमणिरम्भाकापिशायनीधन्वन्तरिगजराजाः
शङ्खतुरङ्गसुरद्रुमचन्दिरधेनुसुधाहरिचापाः।।
ततः प्रकटितं भुवनचतुर्दशसंहरणक्षमगरलम्
सुराऽसुरैः प्रार्थितो धूर्जटिस्तदपि गलेऽकृत सरलम्।।
वासुकिमन्थनरज्जुविवेष्टितमन्दरमण्डित-सिन्धुः!
देवनिचय एकतोऽप्यरतो यत्नपरोऽसुरबन्धुः!!12

दद्यातामिन्द्रवह्नी नृपतिसमुचितं क्षात्रतेजोऽप्यकुण्ठ
नासत्यौ मञ्जुरूपं धरणिधरणिजे प्रीतिगर्भं निसर्गम्।
आयुष्यं सूर्यचन्द्रावसुरसुरगुरू चापि विद्यामशेषां
वैदेहीजातकाभ्यां रघुकुलनियतिञ्चापि दद्याद्वसिष्ठः।।13

क्षोणीचक्रमिवाऽनिशं चतुरुदन्वन्तो मम भ्रातरो
यस्यावन्ति सुमन्त्रदश्च महितोऽमात्यस्सुमन्त्रोऽनघः।
पौरोहित्यमहो बिभर्ति भगवान् वन्द्यो वसिष्ठस्स्वयं
यज्जीवातुचितिर्विदेहतनया किम्मेऽपरं काङिक्षतम्।।1

पितृत्वे सति सिद्धेऽपि मे पुनर्यमजातयोः।
मातृभिश्चिन्त्यमानस्य नक्षयं भाति शैशवम्।।2

शूर्पणख्याः कथा का वा नापि रम्भा तिलोत्तमा।
उर्वशी वाऽर्यपुत्रस्य मनो मोहियतुं क्षमाः।।3

कामं स्यान्मघवाऽप्सरोगणरतिप्रार्थी ललल्लम्पटो
भूपाला ननु पार्थिवाश्च कतिचिन्नूनं बृहद्वल्लभाः।
स्वप्ने चाऽप्यनवेक्षिताऽपरयुवत्यास्येन्दुबिम्बस्य भो
रामस्याऽस्य गतिस्त्वमेव सुमुखि! प्राणैरहं तद्दधे।।4

प्रवाहेण यथा वारां स्थितिर्नद्या महीयसी।
सर्वसौभाग्यसम्पन्ना भवताऽपि तथाऽस्म्यहम्।।5

दृष्ट्वाऽपि वत्समतिरूढतृषं बुभुक्षुं
प्रोथप्लवज्जटिलफेनचयोपपन्न्म्।
संस्कारसंक्षयवशात्स्वपुरः स्थभक्ष्य-
मश्नाति निःस्पृहतया स्वयमेव धेनुः।।6

तत्सान्द्रासु जटासु पक्षिनिचयैनीडान्यहो चक्रिरे
वल्मीकैश्च कृतं गृहन्नु परितो नैकस्फुरद्भूमिकम्।
प्रारम्भे तु मरामरेति तदनु श्रीरामरामेत्युर-
स्यातन्वंस्तपसा महामुनिरभूद्वाल्मीकिनामाऽधुना।।7

निशीथिनीमतिक्रम्य जायते दिवसोदयः।
हेम भूषणतां याति हेमकृट्टङ्किकाऽहतम्।।7

निषादविद्धमालोक्य प्रेयसीरतिसंश्रितम्।
क्रौञ्चमेकं नु यच्छोकः श्लोकतां स्वयमागतः।।8

मधुरमधुरैर्वार्तारम्भैरतत्त्वमनोहरै-
र्धरणिगगनव्याप्तैः स्वीयैः प्रकल्प्यगताऽगतैः।
हृदयमनिशं प्रश्नैश्चित्रैः प्रसह्यविमोहनैः
सखि! शबलयन्तौ तौ जातौ मदेकचिदाश्रयौ।।10

कुशलवौ रघुनाथ सुकोमलौ परुषकाननदारुणजीवनम्।
न हिल सोढुमिमौ सहजं क्षमौ विरहितौ नु कदापि कुटुम्बतः।।1

निमिषमात्रमपि क्षमते न वा जनकजातनुजा किल जीवितुम्।
तदपि नाथ! विचारय दारुणं विशसनं मम यन्त्रितमङ्गलम्।।2

गुरुकुलं तनुजद्वयसङ्गता जिगमिषामि महर्षितपोवने।
अनुमतं यदि ते भवतादिदं कुशलवौ सुखिनौ मम नो व्यथा।।3

त्रिपथगाऽभिषवैर्ननु वृण्वती महितपुण्यमवेक्ष्य तपोवनम्।
कुशलवौ च निवेश्य यथोचितं त्वरितमेव भवन्तमुपाश्रये।।4)

द्वारे पूर्णाम्बुकुम्भः पथि-पथि विपणौ राजमार्गे सुमानि
श्यामा धेनुस्सवत्सा विकसितनयना दक्षिणे क्वापि बद्धा।
कूजन्तश्शोणिताक्षाः प्रमदवनपिका मञ्जु कीराः पठन्त-
स्सम्भारं मङ्गलानां दधति रघुपते! सिद्धसर्वार्थयोगे!!5

पुलिनाभ्यां यथा गङ्गा लोचनाभ्यां यथा तनुः।
तनयाभ्यां तथा सीते! वत्से! सार्थवती भव।।6

प्रसूं त्वामपि विस्मृत्य निजक्रोडप्रविष्टयोः।
कथाश्रावणनिर्बन्धः पौत्रयोर्मां विनङ्क्ष्यति।।7

दिनद्वयं रोदिति बन्धुजाया भ्राताऽप्यहान्येव दशाऽथ पञ्च।
स्मृतौ कृतायां विलपेन्नु तातो माता पुनश्शून्यगृहं विलोक्य।।8

शस्त्रे शास्त्रे प्रवीणो निखिलजगति कः श्रीमदन्यो वदान्यः
क्रौञ्च्याक्रन्दोत्थशोको नवरसमधुरां काव्यतां यस्य यातः।
वैदेहीयुग्मसून्वोस्स खलु यदि भवान् देशिकस्तर्हि नूनं
तत्कण्ठैरादिकाव्यं प्रचरति भुवने तावकीनं समन्तात्।।9

भूपालः प्रशशास यां दसरथो वासिष्ठसंरक्षणे
सोर्वी माघवनी वनी सुरतरुर्यत्राऽस्त्यहो राघवः।
तत्पुष्पासवपानमत्तहृदयो वाल्मीकि भृङ्गो न्वहं
गुञ्जन्मञ्जु मनांसि हन्त कृतिनां सम्भावये सन्ततम्।।10

तौर्यत्रिकं पथि कपोतयुवा विधत्ते
प्रोड्डीय चुङ्कृतमुपार्च्छति नीलकण्ठः।
कारञ्जकुञ्जविनिगूढकलेबरोऽयं
पुंस्कोकिलो गमनमङ्गलमातनोति।।11

पल्यङ्कतल्पशयितो रघुवंशभानुः
पूर्वप्रतीतिवशगस्तनुजौ स्वपार्श्वे।
सम्मार्गयन् निशि न तौ समवाप्य विद्ध
उन्निद्र एव रजनीं क्षपयाञ्चकार।।1

भार्यां क्वचित्प्रहितबाहुलतोऽङ्कपाशे
नोऽवाप्य भग्नहृदयो हतगाढनिद्रः।
उत्थाय भूरिविरहार्दितकान्तकायो
रात्रौ जजागर सहायपरोऽधिशय्यम्।।2

वियोगाऽग्निदहत्कान्तप्रवृत्तिर्धूमसन्निभा।
बाधमानाऽपि प्रीणाति स्वाधीनपितकाक्षिणी।।3

प्राणप्रियां प्रियतमां ननु जीववल्लीं
सीतां विना विरहिणो निखिलास्त्रियामाः।
वत्साननेन्दुपरिवीक्षणसिन्धुकल्प-
श्रीराघवस्य प्रणयोर्मिहता अभूवन्।।4

राघवाऽधिं विजानाति विधिर्वा राघवः स्वयम्।
अहं वेद्मि शुको वेत्ति त्वं विजानासि वा न वा।।5

द्वित्राण्येव दिनानि भूरितपने वीतानि सीतापते-
वैदेहीप्रवियोगकातरतनोर्यद्यप्यदीनाऽत्मनः।
किन्त्वेवं प्रतिभातमाशु निखिलः कल्पो यथा निर्गतो
दाम्पत्यप्रणयच्युतो नु दयितः सर्वं चिनोत्यद्भुतम्।।6

अयि शुभे रघुनायकनायिके धरणिजे विपदुत्सवसङ्गिनि।
प्रियतरौ तनयौ न च राघवः स्थविरकं खलु मां किमुपेक्षसे।।7

सुमुखि! ते हृदयं सुतकेन्द्रितं मम पुनस्त्वयि लीनमनोरथम्।
त्वमसि नो सुखिनी तनुजौ विना न च सुखी विरहे तव राघवः।।8

कुशलवौ रुचितौ मम नेति नो तदपि मैथिलि! राघवजीवितम्।
त्वदनुगं प्रणये तव मज्जितं कथमिति स्वयमेव न वेदये।।9

कुशलवौ रघुनाथ! तवात्मजौ मम पुनर्वपुरात्मधरौ च तौ।
ननु विभज्य निजं त्रिषु विग्रहं त्रितयमेव कृतं मम सौहृदम्।।10

तदपि नाथ! विदेहसुताऽश्रयस्त्वमसि केवलमत्र परत्र च।
सुमफलप्रसवाऽपि लताऽनघा त्यजति नैव तरुं दयिताश्रयम्।।11

शुक्तिकञ्चुकयोर्मध्ये यथा राजति मौक्तिकम्।
तथैव युवयोर्मध्ये पुत्ररत्नमिदं द्वयम्।।12

पुञ्जीभूतं नु पुण्यं दुरितमपगतं स्वर्णदीवारिसेकै-
रारण्या प्राणयात्रा ननु कुशलवयोः प्रीतिदात्र्येव जाता।
क्रीडन्ती कृष्णसारैस्सपदि वृतवती हन्त भूयोऽपि बाल्यं
सम्प्राप्ता त्वं सखी मे किमपरमिह प्रार्थितं कानने स्यात्।।13

कापोतीं कायशोभामिह दधतु दिशो यज्ञधूमप्रसारै-
र्गृष्टीनां रम्ययूथस्स्रुतधवलपया राजतां सम्मुखीनः।
माङ्गल्यान् वेदमन्त्रान् प्रवचनपटवस्सामगा व्याहरन्ता-
माशसन्तां कुमार्यो रघुपतिकुशलं पुष्पलाजाक्षतौघैः।।14

ऊर्ध्वाऽधः क्षिप्रवेगप्रमथितपवनैः कम्पयन् वन्यवृक्षा-
नारावैर्घर्घराढयैः श्रुतिकुहरचयान्स्फोटयन्नेव सद्यः।
संस्थानं श्वापदानामपरिचयवशाद् द्रावयन् भीमरूपो
व्योम्न्यासन्नो विभाति प्रथितगुरुगतिः पुष्पकोऽयं विमानः।।15

बन्धुत्रयसमाश्लष्टे धरित्रीं त्वयि शासति।
मन्ये साक्षान्महाविष्णुः शास्ति सीतारमापितः।।16

अयोध्येनाऽविताऽयोध्या भवता भूभुजाम्पते।
अयोध्यया जगत्कृत्स्नं भाति सम्प्रति रक्षितम्।।17

यन्निसर्गो यदारम्भो यादृशोऽहं महामुने!
तादृशं मा न जानाति लोकोऽयं द्वैधकातरः।।18

भवद्धिश्चित्रितं किन्तु राघवम्मामनाहतम्।
स्थिरबुद्ध्या स्थिरास्तत्वं त्रिलोकी ज्ञास्यति ध्रुवम्।।19

तीरद्वयोपमसुतद्वयपूतकुक्षि-
र्गङ्गेव मैथिलसुता यमवाप्य धन्या।
तं व्योमचुम्बिजनवन्दितकीर्तिसानुं
त्वां नौमि राघव! हिमालयनिर्विशेषम्।।20

प्रणन्ताऽपि प्रणम्योऽपि यस्य मे रघुनन्दनः।
तस्य भोः किमभीष्टं स्यात्सौभाग्यमहिमात्मनः।।21

ब्रह्मक्षत्रपते जगत्त्रयपते सोदन्वदुर्वीपते!
मर्यादाऽधिपते धनुर्धरपते सद्धर्मचर्यापते!
दिव्यज्ञानपते प्रजाजनपते वाचस्पते श्रीपते!
दीनाऽनाथसुहृत्पते रघुपते! सीतापते! पाहि माम्।।22

भार्या मे निमिनन्दिनी जनकजा पुत्रीव संल्लालिता
प्रीत्या मे यमजौ सुतौ कुशलवौ शिष्यो भवद्भिः कृतौ।
कल्पान्तस्थिरया भवत्कवितया यच्चास्म्युपश्लोकितः
तेनाऽहं सचराचरात्मधरणीचक्रः कृतार्थोऽभवम्।।23

पूजास्थानं न मौढ्यं परिषदि भवताद् वैदुषीकञ्चुकस्थं
सच्चारित्र्यं न राष्ट्रेऽनुभवतु निकृतिं सद्गुणा नो त्रपन्ताम्।
नीतिं सेवेत शक्तिः कुटिलपथजुषां जायतां मानभङ्गो
निष्ठां नो न्यक्करोतु प्रसरदभिनयस्सद्वचांसि प्रथन्ताम्।।24

पूर्वसङ्कल्पितं नाट्यं प्रशान्तराघवाऽभिधम्।
मया कृतं हरिद्वारे पूतभागीरथीतटे।।1

गुणार्यम्बरयुग्माब्दे वैक्रमे मार्गशीर्षके।
सुदि भौमे प्रभातेऽह्नि प्रारब्धं नाटकं मया।।2

वदि पौषे च सप्तम्यां भौमवारे निशीथके।
द्वाविंशे दिवसे भक्त्या पूर्यतेऽम्बानुकम्पया।।3

जयरामाश्रमे रम्ये बिल्वनीलाऽद्रिमध्यगे
सन्निधौ पञ्चदेवानां सम्पन्नं शारदार्चनम्।।4

नवप्रस्थानकं नाट्यं संस्कृतप्राकृताश्रितम्।
सचेतसां विनोदाय रङ्गमञ्चोचितं भवेत्।।5